Коронавирус ба зиндагии сокинони Узбекистону Тоҷикистон чӣ таъсире гузошт?
Ба шабакаи мо дар Telegram обуна шавед!
Бар пояи иттилои вазорати тандурустии Узбекистон то субҳи 25 март 55 ҳолати гирифторӣ ба коронавирус сабт шудааст. Феълан, 12,7 ҳазор шаҳрванди Узбекистон дар карантин қарор доранд – қисме дар беморхона ва қисме дар хона.
Сар аз 24 март ҷиҳати ҷилавгирӣ аз паҳншавии каронавирус ҳамсоякишвар ҳолати тақвиятёфта ҷорӣ кард. Аз ҷумла, шурӯъ аз 25 март ба сокинон дар кӯча бидуни ниқоб гаштан манъ шудааст. Ҳаракати тамоми намуди василаи нақлиёт аз дигар минтақаҳо ба Тошканд қатъ гардид.
Ҳамзамон, ба як қатор шаҳрвандон, аз ҷумла хидматчиёни давлатӣ вуруд ба Тошканд иҷозат дода мешавад. Аммо гузаштан аз назорати тиббӣ барои ҳар нафар, ки ба пойтахт меояд ва ё аз он берун мешавад, ҳатмӣ аст.
Чанд рӯз аст, ки кӯчаҳои пойтахти Узбекистон холӣ шудаанд.
Метро ва дигар намуди нақлиёти ҷамъиятӣ дар шаҳр кор намекунад.
Аз 16 март дар тамоми муассисаҳои томактабӣ, миёна ва олӣ дар Узбекистон карантин эълон гардид.
Ҳукумати он кишвар ба муассисаҳои динӣ тавсия дод, баргузории ҷамъомадҳои оммавиро маҳдуд намоянд. Дар масҷидҳо бошад, аз мусалмонон хостанд, дар хонаҳояшон ибодат кунанд.
Тоҷикистон: коронавирус монеи ҷашнҳо нашуд
Бино ба иттилои вазорати тандурустӣ ва ҳифзи иҷтимоии Тоҷикистон то 26 март дар кишвар ягон ҳолати гирифторӣ ба бемории COVID-19 ба қайд нарасидааст.
Шурӯъ аз моҳи феврал то 18 март наздики 1900 нафар, ки аз хориҷ вориди қаламрави кишвар шудаанд, ба карантини дуҳафтаина фиристода шуданд.
Гуфтанист, дар шабакаҳои иҷтимоӣ чанд шикояти афроде, ки дар карантин нигаҳдорӣ мешаванд, чарх мезанад. Аз ҷумла нафароне ки дар осоишгоҳи Варзоб ҷойгир шудаанд, аз ҳолати зидисанитарӣ ва набудани ёрии лозими тиббӣ шикоят кардаанд.
Пас аз шикоятҳо, шоми 22 март ин шаҳрвандон ба осоишгоҳи дигари ноҳияи Варзоб, ки шароити беҳтари зиндагӣ дорад, интиқол ёфтанд.
20 март дар пайи хатари паҳншавии коронавирус Тоҷикистон фазои ҳавоияшро барои хатсайрҳои байналмилалӣ баст. Дигар ҳеч чорае ҷиҳати ҷилавгирӣ аз паҳншавии коронавирус дар Тоҷикистон гирифта нашудааст.
Аҳолӣ аз хатари ин вирус, ки бештар аз домони солмандон ва афроди иммунитеташон заиф медорад, ба таври бояду шояд огоҳонида нашудаааст. Дар қиёс ба кишварҳои дигар, сокинони пойтахти Тоҷикистон карантинро риоят намекунанд.
Солмандон ҳам, ки дар гуруҳи осебпазир барои коронавирус маҳсуб меёбанд, карантинро риоя намекунанд.
Аммо баъзе сокинони Душанбе ва минтақаҳои дигар бо ибтикори худ дар кӯчаҳо бо ниқоб мегарданд.
16 март намояндагии Созмони ҷаҳонии тандурустӣ дар Тоҷикистон ба ҳукумати кишвар тавсия дод, аз баргузории чорабиниҳои оммавӣ худдорӣ варзад. Аммо 21-22 март дар ҷумҳурӣ аз Наврӯз бодабдаба ҷашн гирифта шуд.
Инчунин, мақомот сабқати бузкаширо, ки бо ҳузури даҳҳо човандоз баргузор шуд, манъ накарданд.
Имсол, бузкашӣ дар деҳаи Чавалай, наздикии шаҳри Душанбе гузаронида шуд.
Ин мавод дар доираи лоиҳаи “Giving Voice, Driving Change – from the Borderland to the Steppes Project” омода шудааст.