Кумитаи ҳолатҳои фавқуллода ва мудофиаи шаҳрвандии назди ҳукумати Тоҷикистон моҳи майи соли 2020 ҷиҳати мубориза бо паҳншавии пандемияи коронавирус меъёрҳои санитариро шадидтар кард.
КҲФ дар якҷоягӣ бо созмонҳои байналмилалӣ маъракаи иттилоотиро барои кор бо аҳолӣ дар мавриди чораҳои эҳтиётӣ дар замони пандемия оғоз намуд. Аммо сарфи назар аз даъватҳо барои риоя кардани меъёрҳои санитарӣ, дар шаҳри Душанбе теъдоди ками одамон ниқоб мепӯшанд.
Моҳи июни соли 2020 дар Кодекси ҷиноятӣ ва Кодекси ҳуқуқвайронкунии маъмурӣ тағйирот ворид карда шуд, ки барои нақзи меъёрҳои санитарӣ муҷозот пешбинӣ мекунад.
Мавҷудияти коронавируси навро дар Тоҷикистон танҳо охирҳои моҳи апрели соли 2020 расман эътироф карданд. То он замон одамон дар шабакаҳои иҷтимоӣ аз гирифторӣ ба беморие шикоят мекарданд, ки ба гуфтаи онҳо аз рӯйи нишонаҳо ба COVID-19 шабоҳат дорад.
Дар шароити кофӣ набудани маълумот дар бораи миқёси пандемия фаъолони ҷомеаи шаҳрвандии тоҷик сомонае таҳия карданд, ки онҷо омори алтернативии фавти одамон аз коронавирус ҷойгир карда мешуд. Дар ҷавоб мақомот ин сомонаро баста, барои паҳн кардани иттилои “носаҳеҳ ва тасдиқнашуда” муҷозот таъин карданд.
Дар оғози соли 2021 раисҷумҳури Тоҷикистон Эмомалӣ Раҳмон аз пирӯзӣ бар пандемия хабар дод. Бино ба омори расмӣ, аз 15 январ то 20 июни соли 2021 дар Тоҷикистон ягон ҳолати гирифторӣ ба COVID-19 сабт нашудааст.
Моҳи марти соли 2021 дар доираи барномаи COVAX ба Тоҷикистон аз Ҳиндустон 192 ҳазор вояи ваксинаи Oxford-AstraZeneca оварда шуд. Муовини пешини вазири тандурустии кишвар Самариддин Ализода гуфта буд, тибқи барномаи COVAX эмгузаронии 20 дарсади аҳолӣ дар назар гирифта шудааст.
Маъракаи ваксинзанӣ дар Тоҷикистон 22 марти соли 2021 оғоз гардид ва бино ба омори расмӣ то имрӯз 16,8 дарсади аҳолӣ пурра воксин гирифтаанд.
Ин матлаб дар доираи лоиҳаи IWPR “Amplify, Verify, Engage: Information for Democratisation and Good Governance in Eurasia”, ки аз ҷониби ВКХ-и Норвеж маблағгузорӣ мешавад ва лоиҳаи “Рушди расонаҳои нав ва рӯзноманигории рақамӣ дар Осиёи Марказӣ”, ки онро Институти инъикоси ҷанг ва сулҳ (IWPR) бо дастгирии Ҳукумати Бритониёи Кабир амалӣ мекунад, таҳия шудааст. Муҳтавои матлаб баёнгари нуқтаи назари расмии IWPR, ВКХ Норвеж ё Ҳукумати Бритониёи Кабир нест.